Алег Агееў: Уладам ёсць што хаваць

Сёння ў Гародні ў закрытым рэжыме пачаўся суд над журналістам Анджэем Пачобутам. Яго абвінавачваюць у закліку да санкцый і распальванні варожасці. Журналісту пагражае да 12 гадоў пазбаўлення волі.

Судовы працэс над палітвязем абмеркавалі з госцем “Радыё Рацыя” – намеснікам старшыні БАЖ, юрыстам Алегам Агеевым.

Алег Агееў: З таго што дакладна вядома, менавіта нейкіх уплывовых рэчаў, якія б давалі надзею на хуткае вызваленне нашага калегі, бессэнсоўна шукаць. Гэта хутчэй за ўсё звычайная судовая бюракратыя. Таму б я не шукаў тут нейкіх узаемасувязяў з лёсам Анджэя і тым, што адбываецца ў зале суда.

РР: Ці нейкім чынам гэтае абсурднае абвінавачанне – заклік да санкцый ды распальванне варожасці – патрабуе нейкага юрыдычнага каментару?

Алег Агееў: Гэта адразу трапляе ў вызначэнне палітвязня. Таму што фактычна любы чалавек за рэалізацыю свайго права на свабоду выказвання можа быць узяты пад варту і асуджаны на вялікі тэрмін толькі за рэалізацыю свабоды выказвання. І гэта бессэнсоўнае абмежаванне ў гэтым артыкуле нават у тым, як ён прапісаны ў Крымінальным кодэксе. Гэта бачна звычайным вокам звычайнага наглядальніка. Анджэй амаль з пачатку свайго затрымання быў прызнаны палітвязнем. І нават з таго, што мы даведваліся адразу з моманту яго затрымання і на сённяшні дзень мы бачым, па якіх артыкулах разглядаецца справа ў судзе, гэта безумоўна палітычна матываваны пераслед, які не мае ніякага дачынення да крымінальных спраў у прававых краінах. І таму гэта яшчэ раз зацвердзіла нас, праваабарончую супольнасць Беларусі, што нічога, акрамя палітычна матываванага працэсу, у іх стварыць не атрымаецца. І тое, што справа разглядаецца ў закрытым судовым паседжанні,  таксама сведчыць, што ўладам ёсць што хаваць. Што нават публічны крымінальны працэс ужо не могуць зладзіць і ўсё што ім застаецца, гэта толькі зачыняць дзверы, каб ніхто не бачыў, што адбываецца.

Цалкам гутарку слухайце ў далучаным гукавым файле.

Беларускае Радыё Рацыя