Дзіцячая літаратура па-беларуску з’явілася ў музеі POLIN у Варшаве

2025-08-29 14:51

У Музеі гісторыі польскіх габрэяў POLIN, які месціцца ў Варшаве, акрамя асноўнай экспазіцыі для наведнікаў працуе пляцоўка сямейнай адукацыі «У караля Мацюся», дзе можна бавіць час усёй сям’ёй. Цяпер у дзіцячай бібліятэцы праекту, які ўтрымлівае кнігі на польскай, украінскай, ангельскай мовах, з’явіліся і беларускія кнігі.

Іх прадставіла для бібліятэкі музея выдавецтва «Янушкевіч», піша Reform. news. На пляцоўцы можна знайсці творы Ганны Янкута, Ціны Азевіч, Эльгі Паповай, Анджэя Малешкі, Эрвіна Мозэра і Антона Францішка Брыля.

Музей POLIN называе пляцоўку для сямейнай адукацыі «У караля Мацюся» бяспечнай прасторай для сямей з дзецьмі, якую можна бясплатна наведваць кожныя выходныя. Тут можна маляваць, займацца музыкай, вывучаць родную мову, а таксама пазнаваць свет габрэйскай культуры, традыцыі і гісторыі.

Прагуляцца па залах аднога з найлепшых музейных комплексаў Еўропы — Музея POLIN — цяпер можна ў кампаніі перакладчыка і мовазнаўцы Сяргея Шупы. Менавіта ягоны голас гучыць у беларускамоўным аўдыёгідзе, створаным адмыслова для адноўленай экспазіцыі інстытуцыі.

Таксама для беларускай аўдыторыі ў музеі ладзяцца экскурсіі. У прыватнасці, 31 жніўня і 14 верасня на беларускай мове адбудуцца экскурсіі па часовай экспазіцыі «1945. Не канец, не пачатак», якая расказвае пра досвед польскіх габрэяў пасля Халакосту ў першыя пасляваенныя гады. Запісацца на іх можна тут.

Галоўная выява warszawa.wyborcza.pl.

Крыніца: Міжнародны саюз беларускіх пісьменнікаў

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк