Камунікат ў сакавіку наведае Торунь, Гданьск, Шчэцін, Варшаву і Кракаў

Фонд Kamunikat.org ужо 23 сакавіка прыме актыўны ўдзел у «III Польска-беларускіх сустрэчах», якія адбудуцца ў Торуньскім універсітэце імя Мікалая Каперніка (Collegium Humanisticum UMK, ul. W. Bojarskiego 1, Toruń).

Ужо а 11:30 у Зале Рады факультэта (C.0.39) адбудзецца дыскусія «Чаму Беларусь і сёння перажывае падзелы Рэчы Паспалітай? Дыскусія пра мінулае і будучыню народаў Цэнтральна-Усходняй Еўропы». У ёй прымуць удзел праф. д-р габ. Богуслаў Дыбась (IHiA UMK) і д-р Вадзім Аніпяркоў (IHiA UMK).

А 13:15 у Зале Рады факультэта (C.0.39) старшыня Фонду Kamunikat.org Яраслаў Іванюк правядзе дыскусійную панэль «Забароненая тэма? Беларуская Народная Рэспубліка — незалежніцкі праект беларусаў з перспектывы больш як ста гадоў» з удзелам праф. д-ра габ. Дароты Міхалюк (IHiA UMK) і праф. д-ра габ. Аляксандра Смалянчука (Інстытут славістыкі ПАН). Дыскусія будзе датычыцца, між іншым, кнігі праф. Дароты Міхалюк «Беларуская Народная Рэспубліка 1918–1920 гг.: ля вытокаў беларускай дзяржаўнасці», якая трапіла ў спіс кніг, забароненых у Беларусі.

«III Польска-беларускія сустрэчы» завершацца паказам фільма Мары Тамковіч «Пад шэрым небам», які распавядае гісторыю журналісткі тэлебачання «Белсат», што пасля сфальсіфікаваных выбараў у Беларусі вядзе трансляцыю разгонаў пратэстаў. Яе выяўляе ваенны дрон, пасля чаго яе затрымліваюць. Яе муж змагаецца за яе вызваленне. Паказ пачнецца а 16:00 у аўдыторыі (AB.1.22).

Пасля фільма пра сітуацыю журналістаў і апошнюю хвалю рэпрэсій супраць незалежных выдаўцоў у Беларусі са старшынём Фундацыі Kamunikat.org Яраславам Іванюком будзе размаўляць д-р Аліцыя Бартніцка (IHiA UMK).

24 сакавіка ў Торуні адбудзецца прэзентацыя непадцэнзурнага выдання кнігі «Каласы пад сярпом тваім» Уладзіміра Караткевіча. У сустрэчы ўдзельнічаюць пісьменнік Уладзімір Арлоў і выдавец Яраслаў Іванюк.

Выданне рамана Уладзіміра Караткевіча «Каласы пад сярпом тваім» Фондам Kamunikat.org было даўно чаканай падзеяй — як для чытачоў, так і для тых, хто ўспрымае беларускую літаратуру як жывую частку сучаснасці.

Раман, знаёмы многім пакаленням школьнікаў, быў выключаны з праграмы ў 2023 годзе. Але яшчэ нядаўна гэтую кнігу можна было прачытаць на «Валадарцы» (sic!) і ў іншых турмах, дзе ўтрымліваюцца палітзняволеныя.

Расповяд пра сланоў ў Менску і касманаўтаў над Оршай (дакладна так!) пачуем таксама 26 сакавіка ў Шчэціне, дзе адбедзецца чарговая прэзентацыя «Каласы пад сярпом тваім» — кніга для кожнага беларуса.