На фэсце “Летуцень” прэзентуюць навінкі ад выдавецтва Gutenberg

2025-07-15 18:57

Выдавецтва Gutenberg Publisher анансавала выхад і прэзентацыю дзвюх навінак 26 ліпеня на фэсце «Летуцень», які пройдзе ў Кракаве. Гэта будуць кнігі, якія летась перамаглі ў конкурсе рукапісаў «Шуфлядка»: «Цягнік да Познаня» Аляксея Правалоцкага і «Хто ты, дрон?» Ганны Кручковай.

Зборнік эсэ «Цягнік да Познаня» Аляксея Правалоцкага перамог у конкурсе рукапісаў «Шуфлядка» ў намінацыі «Нон-фікшн» за 2024 год. Гэта другая кніга аўтара (дэбютны зборнік «Жыццё ў дванаццаці апавяданнях» выйшаў у 2024 годзе).

У новай кнізе вас чакаюць пяцьдзясят гісторый пра жыццё без каталіцкага пашпарта і спробу намацаць абрысы новай краіны. Гэта серыя партрэтаў сапраўдных людзей, збольшага палякаў, выхапленых у розных польскіх гарадах і прапушчаных праз эмігранцкі досвед, настальгію і водгалас беларускай траўмы. Некаторыя персанажы з’яўляюцца толькі раз, некаторыя ўсплываюць у розных гісторыях.

Мастак вокладкі Юра Таўбкін.

У тым жа 2024 годзе ў конкурсе ў намінацыі «Творы для дзяцей» перамагла Ганна Кручкова з кнігай «Хто ты, дрон?», якая падыйдзе дзецям ад 9 да 12 гадоў.

2028 год. Адзінаццацігадовая Паліна жыве ў мястэчку каля запаведніка, і яе займаюць тры важныя пытанні.

1. Чаму ваўкі раптам пачалі выходзіць з лесу і нападаць на людзей?

2. Адкуль узяўся дзіўны аўтаномны нейрадрон, які раптам прызямліўся на яе дах?

3. І галоўнае: што стала з бацькам, які знік у джунглях, ратуючы звяроў ад браканьераў?

У пошуках адказаў Паліне давядзецца раскрыць страшнае злачынства і даведацца неймаверную праўду, якая разарве ёй сэрца, але і адкрые дзіўны свет.

Кнігу праілюстравала мастачка Кацярына Першына.

Абедзве кнігі можна замовіць проста цяпер праз сайт выдавецтва (Цягнік да Познаня" Аляксея Правалоцкага і «Хто ты, дрон?» Ганны Кручковай). Адпраўка поштай пачнецца 28 ліпеня.

Крыніца: Міжнародны саюз беларускіх пісьменнікаў

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк