Народная воля 64 (4624) 2021

Ужо 46 дзён у зняволенні знаходзіцца кіраўнік аддзела рэкламы і маркетынгу «Нашай Нівы» Андрэй Скурко. Днямі ад яго прыйшоў першы за два апошнія тыдні ліст. «Ты ў апошнім лісце пішаш, што нічога не атрымлівала ад мяне. Дзіўна, я дасылаў шмат лістоў за гэты час», – піша ён жонцы ў лісце, датаваным 17 жніўня. Андрэй Скурко – не адзіны палітвязень, ад каго лісты даходзяць нерэгулярна. Гэта частая сітуацыя ў нашы дні. Андрэй піша, што займаецца англійскай мовай, чытае Ключэўскага, Стывена Хокінга, у камеры ёсць і падручнікі па праграмаванні. «Турма – гэта побытавы выклік. Набываю тут уменні, якія ў жыцці пасля ніколі не прыдадуцца. Таксама гэта цікавы псіхалагічны досвед. Калектыў з 15 чалавек ужываецца, адаптуецца да новых удзельнікаў, знаходзіць баланс. Усё гэта ў абстаноўцы нетрываласці. Любога могуць у найбліжэйшы час перавесці. Тут многае адыходзіць на другі план, напрыклад, палітычныя погляды. Часам бываюць спрэчкі, але ў цэлым дзейнічае прынцып «галоўнае, каб чалавек быў добры». З тэлевізара вязні даведаліся аб прызнанні партала TUT.BY экстрэмісцкім. Што яшчэ глядзяць вязні? «Нядаўна ўсе разам глядзелі мультфільм пра смурфікаў. У цэлым мультфільмы тут добра заходзяць», – піша Андрэй.

• Месца выхаду: Мінск
• Дата выхаду: 2021-08-24
• Рэдактар: Сярэдзіч Іосіф
• Copyright: © 2021 by Народная воля
• Кнігазбор: Kamunikat.org