У Менску судзяць дасьледчыцу беларускіх вязьняў ГУЛАГу Чарнаморцаву, пракурор запрасіў ёй «хатнюю хімію»

Палітзьняволеную вінавацяць паводле ч. 1 арт. 342 КК («Арганізацыя і падрыхтоўка дзеяньняў, якія груба парушаюць грамадзкі парадак, альбо актыўны ўдзел у іх»).

У Савецкім судзе Менску пачынаецца суд над палітзьняволенай дасьледчыцай Валерыяй Чарнаморцавай. Справу вядзе судзьдзя Вольга Емяльянчанка, паведамляе «Вясна».

Як стала вядома Свабодзе, пракурор запрасіў Чарнаморцавай пакараньне ў выглядзе 2,5 года «хатняй хіміі». Прысуд чакаецца сёньня а 16:30.

Валерыю затрымалі летась 18 кастрычніка ў Менску пасьля ператрусу ў кватэры. Спачатку яе арыштавалі на 10 дзён, пасьля перавялі ў СІЗА-1 і завялі крымінальную справу паводле ч. 1 арт. 342 КК («Арганізацыя і падрыхтоўка дзеяньняў, якія груба парушаюць грамадзкі парадак, альбо актыўны ўдзел у іх») за ўдзел у акцыях пратэсту ў 2020 годзе.

Валерыя Чарнаморцава — дасьледчыца беларускіх вязьняў ГУЛАГу, актывістка БХД, гід. Яна спрычынілася да стварэньня Віртуальнага музэю савецкіх рэпрэсій у Беларусі.