Выйшла кніга «Алесь Бяляцкі на Свабодзе». Электронная вэрсія

10 сьнежня ў Осла адбудзецца ўручэньне Нобэлеўскай прэміі міру. На цырымоніі ня будзе аднаго зь ляўрэатаў — Алесь Бяляцкі вось ужо 17 месяцаў за кратамі, разам з сваімі паплечнікамі з праваабарончага цэнтру «Вясна».

Голас Алеся Бяляцкага некалькі дзесяцігодзьдзяў гучаў на хвалях і онлайн-плятформах Радыё Свабода ў абарону дэмакратычных каштоўнасьцяў у Беларусі.

У кніжнай сэрыі «Бібліятэка Свабоды. XXI стагодзьдзе» выйшла кніга «Алесь Бяляцкі на Свабодзе».

У кнізе «Алесь Бяляцкі на Свабодзе» (аб’ём складае больш як 400 старонак) сабраныя асобныя інтэрвію праваабаронцы, фрагмэнты дыскусій, у якіх ён браў удзел, рэпартажы пра ягоную дзейнасьць пачынаючы з 90-х гадоў, ацэнкі сяброў паплечнікаў. Папяровы асобнік кнігі ўжо ў Осла.

Гэта — ужо другая кніга ў Бібліятэцы Свабоды, прысьвечаная праваабаронцу. У 2012 годзе сьвет убачыла кніга Валера Каліноўскага «Справа Бяляцкага» пра судовы працэс, які каштаваў кіраўніку «Вясны» трох гадоў няволі.