Выйшла кніга Міколы Захаранкі — лаўрэата прэміі Стральцова

Журы прэміі прысудзіла ўзнагароду Міколу Захаранку «За творчае ўвасабленне і захаванне класічных літаратурных традыцый, вернасць мове палескай глыбінкі, метафарычна-фальклёрнае асваенне духоўнага свету беларусаў».

Апавяданні ў кнізе «На тым краі зямлі» сюжэтна-займальныя, населеныя пазнавальнымі героямі палескай глыбінкі. Трагедыя і святочная весялосць іхняга жыцця нібы знутры падсвечаныя напаўказачным святлом. І вершы і апавяданні напісаныя вельмі жывой мовай, якая часта збліжаецца з мовай тых самых персанажаў. Публіцыстычная частка кнігі змяшчае артыкулы на востра-сацыяльныя тэмы.

Рэдактаркай выбранага «На тым краі Зямлі» выступіла Аксана Спрынчан.

Мікола Захаранка нарадзіўся 13 траўня 1949 году ў мястэчку Васілевічы Рэчыцкага раёна Гомельскай вобласці. Закончыў філалагічны факультэт Беларускага дзяржаўнага ўніверсітэта (1986). Доўгі час настаўнічаў у вёсцы Швабы на Лагойшчыне, дзе і жыве.

Публікаваў апавяданні ў часопісах «Полымя», «Маладосць», «Нёман», «Дзеяслоў», «Роднае слова», «Вясёлка», газеце «Звязда», вершы і публіцыстыку ў «ЛіМе». Аўтар дзіцячых п’ес, зборнікаў прозы «І тады ўдарыў бом...» (Менск, 2013), «Такі вецер, такі вецер...» (Менск, 2019). П’еса «Паехалі» ставілася ў 1996 г. на сцэне Нацыянальнага акадэмічнага тэатра імя Янкі Купалы.

Лаўрэат Літаратурнай прэміі імя Міхася Стральцова (2026).