Зь ператрусамі прыйшлі да журналістаў, зьвязаных з Радыё Свабода і тэлеканалам «Белсат». Ёсьць затрыманыя

16 ліпеня праходзяць ператрусы ў офісе і кватэрах журналістаў Радыё Свабода, тэлеканалу «Белсат» і іншых СМІ.

Сілавікі прыбылі да менскага офісу Радыё Свабода, вырвалі камэры відэаназіраньня на паверсе і выламалі 3 дзьвярэй у офісе. Канфіскавалі тэхніку. Інфармацыя пацверджана з некалькіх крыніц, паведамляе ТГ-канал «Мотолько помоги».

Паводле наяўных зьвестак, сілавікі прыйшлі ў кватэру журналіста Радыё Свабода Валянціна Жданко. У яго дома адбываецца ператрус.

Затрымалі былую журналістку Свабоды Іну Студзінскую, у якой у кастрычніку 2020 году забралі акрэдытацыю для працы ў Беларусі. У яе дома правялі ператрус.

Жонка журналіста Алега Грузьдзіловіча, у якога летась таксама забралі акрэдытацыю для працы ў Беларусі, паведаміла пра затрыманьне мужа.

«Алежку забралi у кайданках. Забралі ягоны i мой тэлефоны, усе кампутары i ноўтбукi. Былі 9 чалавек. Яшчэ забралi ўсе грошы, нават з маёй кiшэнi беларускія рублi. Таксама 300 даляраў, якiя заставалiся на жыцьцё. Мы чакалi такога кожны дзень».

Пра ператрус у журналісткі Любові Лунёвай, паведаміў тэлеграм-канал «Белсату».

Ён жа паведаміў, што на кватэры па прапісцы журналісткі Марыі Арцыбашавай выламалі дзверы, яе ў гэты момант у кватэры не было.

Пра ператрус у сваім доме паведаміў вядоўца ток-шоў «Кожны з нас» на тэлеканале «Белсат» і курсаў «Мова нанова» Глеб Лабадзенка.

Сілавікі прыйшлі і па Галіну Абакунчык, якая супрацоўнічала зь «Белсатам». Па артыкуле 293 КК затрымалі вядоўцу праграмы «Лукавыя навіны» на тэлеканале «Белсат» Ганну Галёту.

Вобшук пачаўся ў гомельскага журналіста Яўгена Меркіса, прычым для яго ён ужо другі за год — папярэдні быў у лютым, напісаў сам Меркіс у фэйсбуку.

У Пінску да журналіста Віктара Ярашука прыходзiлi супрацоўнікі Берасьцейскага крымінальнага вышуку. Міліцыянты забралі кампутар, мабільны тэлефон. Сам журналіст на волі. Ператрусы прайшлі таксама ў кватэрах пінскага журналіста Андрэя Якімуша і ягонай маці. Сам Якімуш за мяжой.

Як інфармуе «Эўрарадыё», сілавікі з раніцы ў кватэры журналіста Ігара Ільяша, мужа палітзьняволенай рэпартэркі «Белсату» Кацярыны Андрэевай, якія ў суаўтарстве напісалі кнігу «Беларускі Данбас» пра ўдзел беларусаў у баявых дзеяньнях на ўсходзе Ўкраіны, і якую потым улады Беларусі прызналі «экстрэмісцкай». Апоўдні «Белсат» паведаміў, што Ільяш у Сьледчым камітэце, яго спрабуюць прыніжаць, абыходзяцца груба.

Сілавікі пачалі ператрус і ў горадзенскага журналіста-фрылянсэра Аляксея Кайрыса. Таксама ў Горадні прыйшлі да журналістаў Паўла Мажэйкі і Хрысьціны Чарняўскай, якія супрацоўнічаюць зь «Белсатам». Адбываецца вобшук у фатографа-фрылянсэра з Горадні Аляксандра Саенкі. Саенка праходзіць сьведкам па крымінальнай справе па артыкуле 342 КК. У яго скончыўся ператрус, забралі тэхніку.

Берасьцейскія журналісты, якія рабілі сюжэты для «Белсату», Алесь Ляўчук і Мілана Харытонава, знаходзяцца ў Грузіі, але сілавікі прыйшлі зь ператрусам да бацькоў Леўчука, нічога ў выніку не забраўшы.

«Паводле ч. 1 арт. 342, нібы за падзеі 13 верасьня, вобшук праводзіў ГУБАЗіК», — паведаміў Ляўчук.

Таксама ператрус пачаўся ў дырэктаркі грамадзкага аб’яднаньня «Экадом» Марыны Дубінай па месцы прапіскі па артыкулах Крымінальнага кодэксу 293 «арганізацыя масавых беспарадкаў» і 342 «арганізацыя групавых дзеянняў, якія груба парушаюць грамадскі парадак». Самой Дубінай дома няма.

Ператрус прачаўся ў праваабаронцы Галіны Ўсьцінавай. Галіна — член праўленьня «Прававой ініцыятывы».

У сябра праўлення «Прававой ініцыятывы» Яўгена Пугача таксама прайшоў ператрус. Сілавікі канфіскавалі тэхніку. Яўген на волі, піша the_village_me.

Выламаныя дзверы ў офісе незалежнага прафсаюза РЭП на вуліцы Кульман ў Менску, таксама сілавікі прыйшлі ў сацыяльна-асветніцкую ўстанову «ТаймАкт», паведамляе ​Эўрарадыё.

14 ліпеня адбыліся ператрусы ў офісах 23 няўрадавых арганізацый — ад праваабарончых да творчых саюзаў, дасьледчыцкіх цэнтраў. Затрымана сама меней 9 праваабаронцаў. Ператрусы працягнуліся і 15 ліпеня. Раней міністар замежных спраў Уладзімер Макей папярэджваў, што ў адказ на пашырэньне санкцый супраць Лукашэнкі і ягонага атачэньня ў Беларусі зьнікне грамадзянская супольнасьць.