Абвешчаны пераможцы прэміі імя Алеся Адамовіча за 2024 год

2025-12-29 19:32

29 снежня 2025 года на канале Беларускага ПЭНа адбылася анлайн-цырымонія ганаравання прэміяй імя Алеся Адамовіча найлепшых публіцыстычных твораў, апублікаваных ў 2024 годзе. Штогадовая ўзнагарода ўшаноўвае найлепшыя творы публіцыстыкі, якія не толькі адлюстроўваюць вострыя праблемы сучаснасці, але і нясуць у сабе дух дэмакратыі, праўды і справядлівасці. Прэмія заклікае аўтараў гучна выказвацца на важныя тэмы і змагацца за праўду, як гэта рабіў яе легендарны заснавальнік.

Прэмія імя Алеся Адамовіча была заснаваная Беларускім ПЭНам праз год пасля смерці яе патрона. Гэта сімвал літаратурнага і грамадзянскага подзвігу асобы, якая прысвяціла сваё жыццё барацьбе за правы чалавека і свабоду слова. Фундатаркай прэміі імя Алеся Адамовіча з 2018 года з’яўляецца ганаровая старшыня Беларускага ПЭНа, пісьменніца, лаўрэатка Нобелеўскай прэміі па літаратуры Святлана Алексіевіч.

Сёлета былі ўганараваны некалькі пераможцаў:

за гуманістычнае асэнсаванне беларускага турэмнага досведу з перспектывы дзяцей рэпрэсаваных бацькоў прэмію імя Алеся Адамовіча атрымала Вольга Вялічка і кніга «Ад двух да пятнацацці: Мая мама ў турме» (выдавецтва «Gutenberg Publisher»);

за смеласць і суперажыванне ва ўмовах дыскрымінацыі і гвалту ўганаравана частка кнігі «Цела таксама архіў» аўтарства Насты Манцэвіч (выдавецтва «Пфляўмбаўм»).

Апроч дзвюх прэмій, Рада Беларускага ПЭНа ўганаравала спецыяльнай адзнакай сайт www.spring96.org праваабарончага цэнтра «Вясна» за 25-гадовае паслядоўнае ўсебаковае асвятленне сітуацыі з правамі чалавека ў Беларусі.

Віншуем усіх намінантаў і лаўрэатаў!

Паглядзець запіс цырымоніі можна на Youtube-канале Беларускага ПЭНа.

Крыніца: Беларускі ПЭН

Камунікат.org – Беларуская Інтэрнэт-Бібліятэка

Пры выкарыстаньні матэрыялаў у друку спасылка на крыніцу інфармацыі абавязковая.
Пры выкарыстаньні матэрыялаў у Інтэрнэце прамая гіпэрспасылка на Kamunikat.org абавязковая.
Ідэя сайту Яраслаў Іванюк